Lionel Messi don set di Major League Soccer record for di highest number of goal contributions and assists inside one match during Inter Miami CF’s big 6-2 win over di New York Red Bulls on Saturday night for Chase Stadium for Fort Lauderdale, Florida.
Messi get six goal contributions and five assists for one match wey set MLS records. E don now score and assist for six consecutive league matches.
“All di [goals] bin dey important for di game, but Leo do something historic tonight with five assists and one goal,” Inter Miami coach Gerardo “Tata” Martino talk.
“But I fit no forget Suarez’s three goals and Rojas’ two goals. Di first one, well both, but di first Rojas goal bin dey amazing. But because of di technical aspect of Leo for di assist, I go choose Luis Suárez’s scissor goal as my favorite.”
Suárez score three goals and Matías Rojas score two times as Inter Miami knack six goals wey Red Bulls no fit answer to come back from 1-0 wey dem dey lose for halftime.
Messi and Suárez now dey lead for league with 10 goals each, and di Argentina star also dey top MLS for assists with 12.
“E dey easier with Leo. Obviously we sabi each other, and sometimes you go notice say we sabi where di other dey and we go do movements without need to look at one another. E good for di team,” Suárez yarn.
Martino and Messi get long history together, dem bin dey together for Barcelona and dem play against each other while di Herons coach dey lead di national teams of Paraguay and Mexico. Even with plenty years of experience wey e take watch Messi, Martino still dey talk say di forward performance against Red Bulls go hard to see again.
“Messi bin get exceptional games for Barcelona, during my time with am,” e talk. “But I also remember one semifinal with Paraguay for di Copa America for Chile, where e no score goal and e still be di best player for di field. For Barcelona, e get one game against Valencia where we dey lose 2-0 and later we win 3-2 with three goals from am. And there was another against Sevilla where we dey lose 1-0 and later e score three goals and we win 4-1. I always dey talk dis, and e don too much at dis point, but e always do something new. To dey involved for all six goals of one team wey win 6-2 na something wey go hard to see again.”
Since Messi start to play for Inter Miami for July 2023, e don quickly become one important part of dia success. When e no play, Inter Miami dey 2-4-6 (WDL), but when e dey pitch, dem dey 15-7-3 for all competitions.
“E no be just for dis game wey e be key player. E dey always important. Today, di connection between Messi and Luis for di second half work well, like old times. When dem see each other, di team fit support dem for di game, and when we find space, dem dey very influential for di game,” Martino add.
Miami still dey lead for top of di Eastern Conference table with 24 points for 12 games.
