Federal High Court for Kano don issue order wey stop National Electricity Regulatory Commission and Kano Electricity Distribution Company from dey use di new electricity money tariff for Band A customers.
Di case wey dem mark as FHC/KN/CS/144/2024 na Super Sack Company Limited and BBY Sacks Limited bring am come court.
Others wey dey di matter na Mama Sannu Industries Limited, Dala Foods Nigeria Limited, Tofa Textile Limited, and Manufacturers Association Of Nigeria Limited.
But, di judge wey dey in charge, Abdullahi Liman, don rule on top one motion wey Abubakar Mahmoud, wey be counsel to di people wey bring di case, bring come court. Di judge talk say NERC and KEDCO no fit continue with di new money tariff wey dem wan do until dem hear di main matter wey dem file.
Di order still talk say make dem no dey disturb or threaten di companies wey bring di matter say dem go cut dia light because dem no gree accept di new money tariff.
In April, NERC agree to increase di electricity tariff for people wey dey Band A category.
With dis new tariff, customers wey dey dis category, wey dey enjoy 20 hours of light supply every day, go start to pay N225 per kilowatt, and dis one start from April 3 — from di previous N66 wey dem dey pay.
Since dis sharp increase happun, di House of Representatives and other people wey get interest for di matter don talk say make NERC suspend di new tariff.
